Улсын онцгой комиссын өнөөдрийн хуралдаанаар 0-12 насны хүүхэдтэй ээжүүд, жирэмсэн эмэгтэйчүүд гэрээсээ ажиллах боломжийг бий болгох тогтоолыг дөрөвдүгээр сарын 30-ныг хүртэл сунгалаа.

Өнөөдрийн хуралдаанаар албан ёсоор сунгасан бөгөөд төрийн байгууллагууд энэ шийдвэрийг дагах бөгөөд хувийн байгууллагууд ч мөн дагаж мөрдөх ёстой гэдгийг Засгийн газрын Хэвлэл, мэдээлэлтэй харилцах хэлтсийн дарга Ц.Ганзориг хэллээ. 

Ерөнхий сайд өчигдөр цэцэрлэг, сургууль, их дээд сургууль, Мэргэжил сургалт үйлдвэрлэлийн төвийн үйл ажиллагааг есдүгээр сарын 1-нийг хүртэл зогсоож олон нийтэд зарлах чиглэл өгсөн. Уг асуудалтай холбоотойгоор элсэлтийн ерөнхий шалгалт, төгсөх ангийн сурагчидтай холбоотой техникийн бэлтгэл ажлыг хийж дуусаагүй байгаа тул өнөөдрийн Улсын онцгой комиссын хуралдаанаар хэлэлцээгүй байна. 

Засгийн газрын Хэвлэл, мэдээлэлтэй харилцах хэлтсийн дарга Ц.Ганзориг "Теле хичээл, төгсөх ангийн сурагчид, их дээд сургууль төгсөгчидтэй холбоотой техникийн бэлтгэл ажлыг хийж байна. Хөл хориотой холбоотойгоор хүүхдүүд улирахгүй. Хоцрогдол гаргахгүй байх тал дээр салбарынхан ажиллаж байна. Элсэлтийн ерөнхий шалгалт 7 сарын 2-ноос эхэлнэ. Харин төлбөртэй сургуулиудыг төлбөрөө ирэх жилийн төлбөрт шилжүүлэх асуудлыг хэлэлцэж байна. УИХ-аар маргааш хуулийн төсөл батлагдмагц эдгээр асуудал тодорхой болно" гэлээ.