Санаа аваад хэрэгжүүлээрэй. Бид өдөр бүхэн хийж чадах зүйлс шүү.

Алхам: 1 УРЬДЧИЛАН СЭРГИЙЛ. Хаана аюултай, эрсдэлтэй байна. Тэр болгоныг илрүүл. Өөрийн гэрээсээ эхлээд эрсдлийг хай. Таны хүүхдэд аюултай бүхнийг олж илрүүл. Танай гэрээс эхлээд гудамж талбай, орц, тоглоомын талбай, сургуулиас гэр хүртэлх замд дагуу аюул, эрсдэл учруулж болох зүйлс байвал даруй өөрчлөх санаачлага гаргаарай. Харанхуй гудамж, орц байвал гэрэлтэй болгоё, эвдэрсэн тоглоом байвал засъя, ил утас байвал аюулгүй болгоё. Ерөөсөө оролцоо ийм энгийн зүйлсээс эхэлнэ. Энэ өөрөө урьдчилан сэргийлэх хамгийн зөв алхам. Эрсдэл өндөр айл байвал хяналтаа чангал. 108 болон 107 утсанд мэдэгд.

Алхам:2 ХАНДЛАГАА ӨӨРЧЛӨХ. Тэр угаасаа засрахаас өнгөрсөөн гээд үл тооно. Тэр үл тоомсорлол нэг л өдөр хүүхдийн аминд хүрэх вий. Хэрэв эргэн тойронд чинь үнэхээр архины хамааралтай айл бий бол хороо, дүүргийн хамтарсан багаа уриалаад тэр айлыг өөд нь татахад тууштай туслъя. Байнгын хараа хяналттай байя. Өнөөх чинь эхэллээ шүү гээд шууд дуудлага өгдөг болъё. Хөршүүдээрээ нийлээд тэр айлд шаардлага тавъя. Гэхдээ тууштай бөгөөд урт хугацаанд. Дандаа загнах биш засарч байгаа бол урамшуулъя. Хүн эцэстээ хайр мэдэрсэн үедээ, өөрийгөө хүн гэж мэдэрсэн үедээ л хүч ордог юм. Нэгнээ тээр доор орсон ангалааас татаж гаргая. Бид чадна. Бид тийм уужуу сэтгэл, тэнүүн ухаантай улс.
 

Алхам:3 ЗӨВ ШААРДЛАГА, ХЯНАЛТ. Тиймээ зөв шаардлага. Учир зүггүй загнаад, буруутгаад, үзэн ядаад бай гэсэн үг биш. Утга учиртай, үе шаттай шаардаж суръя. Эргээд хянадаг байя. Хаана архидалт их болоод байна. Хаана хүмүүс ихээр цугларч зодоон болж байна. Хаана хүүхэд хараа хяналтгүй байна. Гэмт хэрэг гарах магадлал өндөр газар бүрт иргэн хяналт тавъя. Цагдаад шаардлага хүргүүлж тийм газруудад ойр ойр эргүүл хийлгэж байя. Дэлгүүрүүд болон бусад үйлчилгээний газар хяналтаа сайжруулъя. Энэ хамгийн бодитой өөрчлөлт авчирна.


 
Алхам:4 ХАМТАР, ДЭМЖ, ОРОЛЦ. Компьютер, фэйсбүүкийн цаанаас биш. Яг хороон дээрээ очоод, хамтарсан багтайгаа хамтраад, шаардлагатай арга хэмжээ авагдаж байна уу гэдэгт хяналт тавиад, дэмжлэг хэрэгтэй бол дэмжээд бодит хувь нэмрээ оруулъя. Иргэний нийгэм сургалтанд суух хүмүүс хайна. Хороо ч мөн адил хайна. Харин иргэд мэдээлэл алга, сургалт алга л гэнэ. Уялдаа холбоо гэж нэг зүйл бий шүү. Групп үүсгэ. Ажлуудаа хуваалц. Ярилц, хамтар, чөлөөтэй дэмжлэг хүс. Өөрсдөө оролцож байж л өөрчлөлтийн салхийг дэгдээж чадна.
 

Эцэст нь алхам бүр таны амьдралтай холбоотой. Та өөр өөрийн тойргийн эрсдэлт хэсгээ тодорхойлоод, бодитой ажил санаачлаад хийгээд эхэлье. Бусаддаа түгээе. Уриалъя. Эхэндээ хэцүү ч гэсэн үр дүн гарна гэдэгт итгээрэй. Хэн нэгнийг юм хийхийг хүлээх бус өөрийн тойргоосоо эхлээд бодит ажлуудыг хийе. Үр дүнг хамтдаа харцгаая.


#ХүчирхийллийгТэвчдэггүйХҮНБАЙ #өөрөөсөөэхэлье #ХҮНБАЙ #beahuman #НүдээНээ