Нийслэлийн Шинжлэх ухаан, үйлдвэрлэл, инновацын газраас “10 000 программист” бэлтгэх төслийг хэрэгжүүлж эхэлcэн. Уг төсөл нь мэдээлэл, технологийн салбарын ажлын байрыг нэмэгдүүлэх, өндөр ур чадвар бүхий хүний нөөцийг бэлтгэх, багшлах боловсон хүчийг чадавхжуулах, программ хангамжийн сургалтын хөтөлбөрийг сайжруулах зорилготой юм.

Гэрэгэ Системс ХХК нь 10’000 программист бэлдэх төслийн хүрээнд “Гэрэгэ Академи” байгуулан Програмч бэлдэх сургалтыг эхлүүлээд байна. Сургалтын танхимын нээлт наймдугаар сарын 17-нд болсон юм.

Хүсэлт гаргасан 350-400 хүнээс шалгаруулж эхний ээлжид 24 хүний бүрэлдэхүүнтэй оройн ангийн ээлжийн сургалт эхлээд байна. Орой анги нь Даваагаас Баасан гарагуудад өдөр бүр 16:00-17:00 цаг хүртэл 12 долоо хоног хичээллэнэ. Төлбөрийн хувьд өөрийн компьютертой суралцагч 390.000 төгрөг бол танхимын компьютер ашиглах суралцагчид 440.000 төгрөгөөр суралцах юм. Бусад сургалтаас ялгарах давуу тал нь 2 суралцагч бүр компанийн нэг инженерээр удирдуулж заавар зөвлөгөө авах онцлогтой.

Компьютерын ухааны доктор (Ph.D), профессор Ю.Намсрай сургалтад хамрагдах хүмүүсийг сонгохдоо хамгийн түрүүнд хүсэл эрмэлзлийг нь харгалзан сонгосон талаараа дурдлаа. Мөн 15-аас дээш настай, программ хангамжийн талаар мэдлэг эзэмших хүсэлтэй хүн бүр энэ сургалтад хамрагдах боломжтой юм байна.

Математикийн ухааны доктор (Ph.D), профессор Д.Гармаагийн хэлснээр “Уг сургалтад сууснаар Алгоритм зохиох Програм бичих суурь мэдлэг, чадвар эзэмшинэ, англи хэл дээрх мэргэжлийн текст уншиж ойлгож хамтын кодын технологийн дагуу багаар ажиллах чадвар эзэмших юм.”

Түүнчлэн Гэрэгэ системс компанийн үйл ажиллагаа эрхэлсэн захирал А.Отгонбаяр сургалтын талаар “Суралцагчдаа төгсөхөд 100 хувь ажлын байраар хангах бөгөөд төсөл дууссан ч гэсэн сургалт цаашид үргэлжлэх боломжтой” гэв.

Дараагийн ээлжийн бүртгэл явагдаж байгаа бөгөөд сургалтыг есдүгээр сард эхлүүлэхээр төлөвлөөд байна.