Баянгол дүүргийн 5, 6 дугаар хороо буюу 25 дугаар эмийн сангаас Саппорогийн уулзвар хүртэл мөн Улсын гуравдугаар төв эмнэлгээс Гэмтлийн эмнэлгийн нутаг дэвсгэрт өнөөдрийн 03:00 цагаас эхлэн энэ сарын 11-ний 06:00 цаг хүртэл гурван хоногийн хугацаанд орох, гарах хөдөлгөөнийг хязгаарлалаа.

Тус дүүргийн зарим хороодод тандалт, судалгаа хийх зорилгоор хөдөлгөөний хязгаарлалтыг гурав хоног тогтоож байгаа бөгөөд ийм чиглэлийг Нийслэлийн онцгой комиссоос өгсөн байна.

Энэ хугацаанд Баянгол дүүргийн 5, 6 дугаар хорооны явган зорчигч болон автомашины хөдөлгөөнийг бүрэн хязгаарлаж байгаа юм. Эмнэлэг, онцгой комисс, цагдаагийн байгууллага зэрэг төрийн албаны машин хөдөлгөөнд оролцоно.

Өнөөдрийн байдлаар Баянгол дүүргийн 1-20 дугаар, 25 дугаар хороонд коронавирусийн халдварын 72 тохиолдол бүртгэгдээд байгаа юм.

Явуулын 50 баг нийт 300 хүний бүрэлдэхүүнтэйгээр байр тус бүрээр очиж PCR шинжилгээг авах юм байна. Иймд иргэн бүр шинжилгээндээ идэвхтэй хамрагдаж, иргэний үүргээ биелүүлэхийг Баянгол дүүргийн шуурхай штабаас уриаллаа.

Дээрх хоёр хорооны иргэдээс тандалт илрүүлгийн шинжилгээг хоёр хоногийн хугацаанд авч, хязгаарлалтын дэглэмийг цуцлах юм байна. Хязгаарлалт тогтоосон 5, 6 хорооны нутаг дэвсгэрт үйл ажиллагаа явуулж буй хүнсний дэлгүүр, эмийн сан, бусад хөдөлгөөн хэвийн үргэлжилнэ.