Хүн бүрийн дотор "дотоод хүүхэд" оршиж байдаг гэдэг. Бага насны хүүхэд өдөрт дунджаар 70-100 удаа "Яагаад..." гэж томчуудаас асуудаг. Тэгвэл томчууд бидэнд ч "Яагаад?" гэдэг асуулт хааяа төрдөг шүү дээ. Хэрэв урьд өмнө нь төсөөлж ч байгаагүй учир битүүлэг, тааварлашгүй бодол төрвөл хүн хэнээс ч асуух билээ дээ. Харин хиймэл оюун ухаан хөгжиж буй энэ цагт тэдгээр "тэнэг" асуултыг тэднээс асуухад хэн ч элэг доог хийхгүйгээр шинжлэх ухааны талаас нь оновчтой байж болох /оновчгүй ч байж болно/ хариултыг хэлээд өгөх давуу талтай аж. 

Тэгвэл ChatGPT, DeepSeek гэх мэт хиймэл оюун ухааны платформоос хүмүүсийн асууж байсан этгээд, хачин асуултуудыг хүргэж байна.

Логик төрлийн асуултууд:

• Хэрвээ би өнгөрсөн  цаг хугацаа руу явж, өөрийнхөө төрөхийг зогсоовол би хэн болж хувирах вэ?
• Бүх зүйл дууссан юм бол, одоо байгаа энэ зүйл юу юм бэ?
• Толь өөрийгөө харж чаддаг уу?
• Би өөрийгөө хар дарсан зүүд зүүдэлж байна гэж зүүдэлбэл яах вэ?
• Хэрвээ хүн ялаа шиг хурдан сэтгэдэг байсан бол, цаг удаан өнгөрч байгаа юм шиг санагдах уу?
• Хэрвээ бид усанд ороход нойтон болдог юм бол, загас яагаад хэзээ ч “нойтон” байдаггүй юм бол?

Шинжлэх ухааны онолд тулгуурласан этгээд асуултууд:

• Хэрвээ нар нэг өдөр гэнэт алга болбол бид яг хэдэн минут амьд байх вэ?
• Хэрэв бидний ДНХ-ийн дарааллыг бүхэлд нь дуу болгон хувиргавал, ямар төрлийн хөгжим гарах бол?
• Сансарт хашхирвал юу сонсогдох вэ?
• Атом өөрийгөө мэдэрдэг үү?
• Хэрвээ соронз маш хүчтэй бол цаг хугацааг гажуудуулж чадах уу?
• Хэрвээ хүн сармагчнаас үүссэн юм бол бид буцаад сармагчин болж чадах уу?
• Хэрвээ би өөрийгөө идвэл, би томрох уу, эсвэл алга болох уу?
• Хэрэв би минут тутамд өөрийгөө хуулбарлаж чаддаг байсан бол нэг жилийн дараа миний хэдэн хувилбар бий болох вэ?